Monday, October 21, 2013

LOS DJUDYOS DE PRAGA

EDMOND COHEN

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Un anunsyo por empesar: el martes ke vyene, 22 de oktovre, a las dos i un kuarto, los atelyes de konversasyon de Vidas Largas van a empesar por de muevo. Van a ser este anyo tambyen al Centre Communautaire, 119 rue Lafayette Paris (10°). Vos kombido a venir numerozos. Ke no se espanten los ke no avlan kolay. Ke sepan ke dinguno del atelye, yo inkluido, avla kolay. Ay unos ke avlan un poko manko charpik ke los otros, ama kada uno ayuda al otro komo puede, i de esta manera mos entendemos. Estos atelyes son un momento de amistad, i los ke no vyenen pedren muncho. Esto no lo vo dizir kada semana, ama es pekado, los ke tyenen el tyempo i la posibilidad de venir i ke no vyenen. Es pekado para eyos i para muestra lingua, ke aze parte de lo ke fuimos i de lo ke semos dainda.
Esto dicho, de kualo avlarvos oy? En primero pensi de avlarvos del Maharal de Praga komo vos avli del Gaon de Vilna, salvo ke no topi bastante de dizir durante vente minutos sovre este grande haham, yo ke no lo so, ni grande haham ni chiko. Por esto me pensi de avlarvos de los djudyos de Praga mas en jeneral i de sus istorya, i de esta manera vos diré unas kuantas kozikas sovre el Maharal, ama tambyen sovre Kafka, sovre el kampo de Terezin, sovre el ayudo de la Tchekoslovakiya a Israel en primero i a los arabos despues, sovre el procheso de Praga, ets.
Empesaremos, komo se deve, por el empesijo:
Los djudyos aparesen en el territoryo cheko a lo mas tadre en el siglo 10, syendo ke el viajador djudyo Ibrahim Ibn Jacob, embiyado por le Khalif de Cordoba, eskrivyo ke en 965, kuando estava en Praga, eskrivyo ke en Praga vyenen a la vez los Rusos i los slavos desde sus sivdades, i los muzulmanos, los djudyos i los Turkos vyenen del “pais de los Turkos” kon ropas i monedas.
Aprovecho esta okazyon para travar vuestro tino sovre el fakto ke los djudyos no asperaron 1492 para bivir en la “Tyerra de los Turkos”, ke por siguro no era dainda Estambol, ni mismo la Turkiya de oy. Los turkos konkistaron Anadol solo en el siglo 11, i vos esto dainda avlando del siglo 10. Los turkos son dainda en lo ke se yama el Turkestan, un grande territoryo al este de la Mar Caspiena. Ama esto, mismo si es interesante, mos alesha de lo ke mos okupa oy, kijo dizir los djudyos de Praga…
Por siguro, los djudyos de Praga en la Edad Medya sufrieron komo sus ermanos de los otros paizes de Evropa, sovre todo del tyempo de la Kruzadas, tyempo de matansinas de djudyos.
El prinsipe Sobeslav II da a los djudyos, por su reglamento de 1174, libertad de azer sus komersyos, ama unos kuantos anyos despues, en 1215, el Konsilyo de Latran los mete a basho, interdiksyon de kaji todos los lavores salvo la uzura, ovligasyon de bivir en chikas males solo para djudyos, ets. Ama esto tampoko no surea tanto, porke en 1254 el rey de Bohema Premysl Ottokar II da a los djudyos libertad de relijyon i los mete basho la proteksyon del rey. Kyen se va kontra un djudyo se va kontra el rey. Despues el rey Carlos IV vyene konfirmar esta proteksyon, lo ke no impide ke los djudyos sean matados, komo en las Pascuas 1389, ande miles de djudyos son asesinados por la djente solevantada por papazim fanatikos. El haham Avigdor Kara, testigo de esta matansina, eskrive una elejiya ke dainda es meldada kada Yom Kipur en el kal Stare Nova de Praga. Dos siglos despues, en 1541, los djudyos son echados afuera de la sivdad. El Emperador Ferdinand Iero de Habsburg ovliga los djudyos de yevar un senyal ke permite de distingirlos de los kristyanos.
rabbi_loew
Estatua de Rabbi Judah Loew situada en el nuevo Ayuntamiento de Praga.
Enfin en 1567 los djudyos son permetidos por Maximilian II de kedarse en Praga, kon libertad. Estamos en el tyempo del Maharal de Praga, sovre el kual vos keriya solo avlar en primero. El haliz nombre de este haham, nasido en Polonya, en Poznan, era Juda Loew ben Bezalel. Es mas konosido komo Morenu Harav Loew (muestro maestro el haham Loew) lo ke mos da Maharal. Todos son d’akodro para dizir ke se muryo en 1609, ama ay mas shupe sovre el anyo de su nasimyento: 1512 en Wikipedia en franses, 1520 en Wikipedia en ingles, 1525 en el sityo de los Lubavitch.
Fue un tyempo haham bashi de Praga, fue tambyen en un otro tyempo haham bashi de Polonya en Poznan, ama es en Praga ke se muryo i es en el semetaryo de Praga ke fue enterado.
Eskrivyo un alay de livros, ke no meldi, povereto de mi, i ke no vos vo nombrar, salvo dos, el uno intitolado Gur Arie (el leon mansevo) ,un komentaryo de Rashi, el otro intitolado Tifereth Israel (la Glorya de Israel) un penseryo filozofiko sovre la Torah .
Lo ke kale saver es ke el Maharal teniya una fama ke iva no solo ande los djudyos, ama tambyen ande los kristyanos, inkluyendo el emperador el mismo, ke teniya muncha konsiderasyon verso el. El Maharal no era solo nombrado por su konosensya de la ley i de la Kabala, ama tambyen de las syensyas profanas, i por empesar las matematikas i la astronomiya , ke aziya kon su amigo Tycho Brahe, muy famozo astronomo de su epoka.
I no me puedo kedar sovre el Maharal sin avlarvos del Golem, lo ke parese ser una leyanda nasida mas de dos siglos despues de su muerte. Asigun esta leyenda, el Maharal aviya echo un ombre de tyerra, ke aziya mover kon el nombre del Dyo, i ke protejava los djudyos de Praga. Esta leyenda salyo un poko despues ke Mary Shelley eskrivyo su famozo livro Frankenstein, en 1818.
Agora, el Maharal es mas konosido, sino de los djudyos, a lo manko de los kristyanos, por la leyenda de su Golem ke por su ovra relijyoza i filozofika. Tyene su estatua sovre el han de la mayoriya de Praga.
Dainda no tenemos en Troyes una estatua de Rashi sovre el han de la mayoriya, ama yene muestra glorya nasyonala tyene agora en Troyes una estatua en una plasa ke ya vijiti, ama esto tambyen mos alesha de los djudyos de Praga, afillu si tengo plazer de salir de vez en kuando de lo ke esto kontando para ir a dolashear un poko en otras kozas…
Al empesijo del siglo 18, los djudyos de Praga se desveloparon tanto ke Praga se izo la sivdad la mas povlada de djudyos de todos los paizes kristyanos, kon 12.000 djudyos. Vyendo esto, el emperador Carlos IV permite ke solo un ijo pueda kazarse en una famiya djudiya. Despues de esto, Maria-Teresa dechiza de echar afuera los djudyos de Praga . Son 13.000 ke se van en las sivdadikas serka, de tal manera ke Maria-Teresa los echa de muevo afuera, esta vez de los paizes de lingua cheka.
Sovre el sityo de Radio Praga un David Alon, ke asigun su nombre parese ser djudyo, mos eskrive kozas komo: “Es vedra ke los djudyos de Bohema konosyeron los pogromes de la Edad Medya, ama menos ke en otras partes…El antisemitismo de estado es ajeno de las tradisyones politikas del pais…” Otrunpoko, mos va demandar de kualo se kesharon los djudyos…Kale ser kontento de ser menos martirizado ke el vizino.
Agora, asigun kada pais, los djudyos bivyeron muy byen en el…mismo del tyempo de la shoa. Esto me inyerva un poko. Ama yene mos estamos aleshando de los djudyos de Praga!
Al kavo, es vedra ke en 1748, los djudyos van a ser permetidos de aboltar en Praga kon la paga de una djeza muy dura, basho la kondisyon de bivir en el ghetto yeno de djente, de hazinuras, kon el riziko de fuegos. Solo la venida al poder de Joseph II va amijorar la kondisyon de los djudyos. En 1781 sale una “toleranzpatent” ke les da libertad de relijyon i les permite de entrar en las eskolas segundaryas i mismo a la universidad. Por esto la male djudiya se yama asta oy Josefov.
Por lo tanto no kale pensar ke todo se enderecho. En 1844, los ovreros de teshidos destroyen las fabrikas de teshidos pertenesyendo a djudyos. Yene en 1848, i por la primera vez, los djudyos son sivdadanos komo los otros .
De este diya los djudyos se van a desvelopar mas i mas, en dos partes: los ke avlan alman ( no kale olvidar ke en este tyempo Praga aze parte del imperyo austro-ungarezo) i los ke avlan ceko.
En 1899 una manseva es topada asesinada, i pishin la djente akuza los djudyos de matansa rituala, i un desmazalado Hilsner, kunduryadji de su kazal es aferrado, akuzado i kondenado a muerte. El solo ke lo va defender, en el mizmo tyempo ke Zola defende a Dreyfus en Fransya, va ser Thomas Masaryk, ke sera mas tadre el primer prezidente de la Republika tchekoslovaka. Grasyas a el, ke pelea para amostrar su inosensya, Hilsner va eskapar de la muerte unos kuantos anyos mas despues.
kafkaUn poko antes estos evenimyentos ke amostran ke no era kolay de ser djudyo, nase en Praga en 1883, en una famiya djudiya, Franz Kafka. Kale saver ke si Kafka el mismo se muryo en 1924, su padre i su madre le sovrebivyeron asta 1931 i 1934. En kuanto a sus tres ermanas, van a ser deportadas durante la gerra en el Ghetto de Lodz ande se van a morir en 1941,1942 i 1943.
Kafka, ke avlava i eskriviya en alman, izo estudyos de derecho i fue doktor en derecho en 1906, i va entrar en una Kompaniya de Seguridad, i toda su vida sera seguritadji.
Ama lo ke lo interesa, no es su ofisyo, ke es solo, dize, para ganar de komer, es de eskrivir literatura.
Despues de varyas ataduras kon mujeres ke no turaron, eskapo por topar una mujer djudiya sufu, Dora Diamant. Kon eya se intereso al Talmud, i, sionisto, penso un tyempo ir kon eya en Palestina. Ama su salud era muy negra i se muryo a 40 anyos de tuberkuloz. Komo se save, fue enterrado en el semetaryo djudyo de Praga.
Oy Kafka es konsiderado komo uno de los eskrivanos los mas grandes del siglo 20. Por tanto, el mismo kemo munchas kozas ke eskrivyo, o Dora lo izo kon su orden. Kale saver tambyen ke Kafka demando a su amigo Max Brod ke toda su ovra sea enteramente kemada. Orozamente, no solo Brod dezobedesyo, ama a la rovez el mismo izo puvlikar ovras komo El Prochezo (Der Prozess) o el Kastiyo (Das Schloss). Mas despues los nazis kemaron tambyen a ovras eskritas ke toparon. Tal un profeta, Kafka entendyo antes de los otros lo ke iva advenir despues de el. El entendyo la fuersa del poder ke maja el individuo sin ke entyenda lo ke le afita.
En memorya de Kafka kedo un byervo: kafkayano, para deskrivir una situasyon tan embroyada, komo un suenyo negro, ke dinguno entyende komo salir de esta tiralanya.
Desharemos Kafka para ayegar a poko a poko a la terrivle realidad ke va aharvar a los djudyos de Praga. En primero va ser la veluntad de Hitler de tomar al territoryo dicho de los Sudetos, i en la konferensya de Munich en 1938, la Fransya, ke por tanto teniya un tratado kon la Tchekoslovakiya para defender sus fronteras, desha su palavra i abandona kaji la Tchekoslovakiya a Hitler. Churchill deklaro en el Times del 7 de novyembre 1938: “teniyan de eskojer entre el dezonor i la gerra. An eskojido el dezonor, i tendran la gerra”. Teniya razon.
La gerra empeso un anyo despues, i no tengo menester de kontar lo ke fue de los djudyos. En primero, desde 1941, los djudyos son deportados verso los ghettos de Polonya. Esto va ser, komo ya vos dishe, el destino de las tres ermanas de Kafka. Despues los Almanes van a meter los djudyos en el kampo de Terezin, al norte del pais, i de aya los van a deportar en los kampos de eksterminasyon. 89.000 djudyos de Bohema-Moravia van a ser deportados, i va ser la muerte para 80.000 de eyos. Mas ke para la Fransya entera.
Despues de los Almanes son los rusos ke vyenen i la Tchecoslovakia va kaer entre las manos de los komunistos. De muevo no es kolay para los djudyos, ama a lo manko kale dizir que la repuvlika cheka vende armas a los djudyos de Palestina, en primero a eskondidas kuando ay los inglezes, despues sin eskonderse kuando nase el Estado de Israel, i es vedra ke las armas venidas de Tchecoslovakia van ayudar muncho a la viktorya de Israel. Un solo entre los kapos chekos era kontra: era Slansky, uno de los kapos komunistos lo mas altos.
Ama las kozas van a trokar. En 1952, el mismo anyo ande Staline aze matar a 13 eskrivanos yidisch, 14 komunistos chekos de alto nivel son aferrados por la polisiya cheka. Entre eyos, 11 djudyos, inkluyendo Slansky. Todos van a atorgar, en las kondisyones deskritas por Artur London en su livro L’aveu (el atorgamyento) los krimenes de kuales son akuzados, i la mayor parte (11 sovre 14) es kondenada a muerte i egzekutada.
Tres anyos despues, la Tchecoslovakiya va empesar de vender armas solo a los arabos.
En 1968 (la primavera de Praga) los chekos aprovan de tomar un poko de libertad, ama vyenen los tankos rusos i los estudyantes eskriven sovre las paredes de Praga: “Lenine, espertate, se izyeron lokos!”
Los djudyos ke lo pueden se fuyen del pais. 19.000 se aviyan ido a la fin de la gerra, 15.000 se van a fuir depues de 1968.
Agora kedan 6.000 djudyos en el pais entero, 1.200 en Praga, sovre mas de un million de moradores.
Al djueves ke vyene, si kyere el Dyo!
_____
De eSefarad, Noticias del Mundo Sefaradí, 15/10/2013 (Transcrito de la emisión radial Muestra Lingua), París, Francia
Foto: Museo judío de Praga

No comments:

Post a Comment